雖然應承過大家今集講Neil
Barrett, 但係因近日發生左一件事係小弟身上, 所以我想發表一下我少少個人意見. 講之前, 我都想提醒大家, 依個只係我自己個人睇法,
每件事, 唔同人有唔同睇法, 特別係講到Fashion, 衣著, 藝術等等問題既時候.
事源就係20歲仔既我, 抱住青春既本錢,
就係衣著上進行不斷既實驗, 近期就愛上HBA, PYREX VISION等等既Style, 黑白主題, 彷裙既下身配上Leggings.
不過有讚美既同時, 當然有彈既聲音.
一條好有問題既問題向住我飛, 實際係乜就唔講喇,
不過係只有一個Sexist會問既問題. 我知道唔同場合, 對唔同人, 要唔同衣著, 正如我見長輩我就會斯文一d.
因為我唔應該強逼老人家接受咁前衛既文化, 不過"裙"竟然令香港既一個年青人改變成一個Sexist, 真係令我幾失望.
當全世界社會都推動男女平等既世代, 唔通男女之間仲要保存住如此既Stereotypes?
我不嬲都唔會理會依種說話, 因為前衛既作風永遠都會有接受唔到既人, 自己著得舒服, 有自信,
最緊要開心就得.
  |
(左) Emma Watson in YSL, 唔知依張相夠唔夠女人味呢?
(右) Traditional Scottish Kilt
|
|
女士應該唔好著褲要著裙先係真女人?
咁你就去問下Christian Dior 或 Yves Saint Laurent依個問題, 兩位身為出名係女性西裝加入西褲既設計大師, 我就好想睇下佢地點回答你.
男土應該唔好著裙要著褲先係真男人?
咁你就去問下蘇格蘭傳統男士依個問題, 裙作為佢地國家傳統服飾, 你去問佢地做乜著裙, 我又好想睇下佢地點回應你.
其實依個Topic我都想開好耐喇, 因為我只係一個打拼中既後生仔, 好多時去到Interview, 或者Presentation,
要求要Formal Dressing既時候, 我都會認真考慮一下打扮, 一來我對自己有要求 (其實係貪靚仔, 我認),
二來我實在頂唔順去到既時候會有幾十個好似照鏡一樣既人一齊坐係度等...
 |
JayZ你可以拗話佢潮者,
但Warren Buffett, 人地老人家都好識著衫架.
|
西裝一定係黑tie, 白裇衫, 黑外套？咁就請你拎起本GQ, 啊, 太前衛既雜誌, Forbes或者Time吧, 有幾何我地會見到CEO著到咁? Business Formal就唔一定要黑黑白白既, 唔好著到複制人咁一式一樣先得架, 除非你靚仔到都敏俊咁, 茫茫"黑tie, 白裇衫, 黑外套"海入面, 一眼就認得返你出黎啦, 唔係既話就No No.
 |
Um...連都敏俊xi件裇衫都有特色架
|
好多時候, 文化藝術等等係需要大家勇敢咁跳出已有界限, 未必一定要破舊, 但係一定要立新, 一路只係跟風, 人做我做又點會有新意? 唔通男既就只可以白T-Shirt, 藍色牛仔褲, 白波鞋, 女既就只可以粉紅花花長裙, 紫色高踭鞋? 咁樣既一個世界都好悶下.
到最後, 可能我都仲未明白咩係時裝衣著, 我就認為係自己個性表達, "An Expression of Your True Self", 不過當我自己反思我係咪太過自我陶醉, 唔接受意見既時候, 我亦都希望問出如此問題既你, 考慮一下自己係咪時候要放下成見, 然後放眼世界?
