Microsoft Surface Pro 3

首先要同大家講句新年快樂, 因為新年假同我自己考試既關係已經好耐冇見。我應承過大家我會同大家睇下部 Surface Pro 3, 經過我一輪趕功課, 上堂, 溫書, 確實係試到佢係我工作上到底幫到我幾多。

首先要講少少佢既不便, 因為要另外訂購Type Cover既關係, 我等左成兩個星期先可以將佢變返做一部 notebook. 不過公度d講我都係因為貪靚, 想個 Cover襯返支筆既顏色, 所以先等紫色中文鍵盤等左一排。

唔知大家仲記唔記得我之前係Macbook Air同Surface Pro 3入面做選擇, 最後因為想留返係 Windows家庭同埋有筆既原因, 我就決定要部Surface! 而我依加正正就係用緊支筆寫緊依篇 blog, 不過一陣再深入討論!

首先真係要讚下佢嘅 mobility. 可能因為我之前用既係一部足足有 2 kg嘅 Fujitsu, 到到依加連電腦袋都唔一定要帶, 細到可以放入本身用緊既 clutch入面, 同埋單手拎住都唔會十分吃力, 單係呢一點就已經抵讚。其實如果你唔拎埋個 keyboard, 只係當一部 tablet 咁嘅話, 就算加埋個 Type cover, 都只係絕對係一部 ultrabook 嘅重量!

個 mon 同支筆嘅配合都係一流,對比度非常之高, 顏色靚畫面亦都好 sharp, 支筆既手感好舒服, 壓力感應同重量平衡都係相比我用過既好。支筆係行藍牙嘅, 所以需要入粒 AAAA 電, 雖然係冷門加難搵, 不過買機會有一粒送既, 佢話用到半年, 再算啦。

支筆令到成部機變成我上堂抄 notes 嘅好朋友, 只要撳個制就即刻抄得,有時notebook都只可以開個Microsoft Word黎打字,我就可以畫埋圖, 正~

今代跟嘅, 係新一代Type Cover, 舊版都一樣可以用到, 只係因為大細唔同左, 所以會有少許奇怪。新嘅 Type Cover 最大賣點就係加多左個磁石位,令到個 keyboard 更立體, 更好手感, 而且加上背光功能, 開夜車都唔怕要摸黑啦, deadline fighter 嘅最好朋友! 不過我個人用嘅時候我又唔係好鐘意新嘅磁石位, 反而平放貼台我更舒服更實在。

如果你問我有冇後悔我依個選擇, 我都幾確定答你, 無。講真一入到學校個個都拎住部 MacBook Air, 而每一次我放低部Surface, 行緊返位就click一下支筆, OneNote已經等緊我, 再唔係每次click個Type Cover上去既時候都會引黎好奇同讚嘆既目光,不知幾型啦~

嘗試用幾個字黎總結部Surface我就會用Functional and Flashy喇。你呢? 

《新學年有感》

又有一排冇同你地update喇, 因為又要準備開學喇, 所以有d忙.

當然, 我唔會突然打篇blog《新學年有感》咁啦, 今次係想同大家預告一下黎緊我將會品評一下Surface Pro 3.

經過一輪認真既考慮, 係MacBook Air同Surface Pro兩個之間, 我選擇左後者. 機就已經訂左喇, 等緊拎.

其實由Surface一面世以來, 我都已經對佢既設計好有興趣, 但係一開頭既Surface RT又冇full Windows, Surface Pro又有好多評論話電池既續航能力差, 所以一路都忍住手.

到Surface Pro 3既出現, 令我到我覺得佢已經由之前既新手, 變成依加(個人認為) 內外兼備既Notebook殺手. 仲要支援埋手寫筆, 要jot notes, 改文真係方便唔少!

詳盡既內容等我收貨, 再上手玩一陣先慢慢再講, 只係唔希望期望越大, 失望越大啊.

唔知你地有冇人已經入左手呢? 又有冇MacBook用家覺得我做左個錯誤既決定? 大家交流下啦!

耳機

有一次同人講到耳筒, 當佢係我面前講到一對平平無奇既耳筒有幾勁, 有幾好聽, 又人體工學既時候, 我就發現大家作為消費者既時候, 成日都俾唔同公司既市場策略同銷售手法等等蒙蔽, 其實根本就唔清楚自己有咩選擇, 同埋自己用血汗錢換黎既到底係乜野野.

我之前用緊對Westone 3, 已經跟左我一段時間, 我亦都好鐘意依對耳機夠平均, 夠暖, 所以近幾年黎都係我必然主力, 另外我有用來聽R&B, Hip Hop, Electro等等既Sol Republic Tracks V10, 仲有副聽人聲超班既Klipsch Image X10, 佢地就專係放係屋企, 幫輕下對Westone. 正如大家所見, 上面三對耳筒/機都係入耳式(In-Ear) 同埋過頭式(Over-ear) 點解? 係因為計音質, 舒適等等都唔會選擇普通既Ear Buds.

高級耳機既價錢大多都取決於耳機本身有幾多個單元, 簡單黎講, 就係有幾多粒發音既野. 以上邊我提到既Westone 3為例, 佢就係3單元既, 高, 中, 低音各1粒所組成. 價錢大概係$1000一粒左右, 所以就算有人同你講或者介紹耳機比你, 你就可以心裡有數, 價值大概係幾多.

你可能會發現大部份所謂靚耳機都係入耳式, 而你又唔習慣帶入耳式, 會覺得耳仔唔舒服, 而我朋友亦有同樣問題. 不過千祈唔好因為依個原因而放棄, 因為解決方法係好簡單架, 你只要換左跟機送既個對矽膠就得! 只需要去比較大型既唱片鋪, 或者耳機專門店就會搵到可以換既Foam Tips, 只要買返同自己耳機相對既型號就得.


依d用記憶海綿做既耳綿將會舒服過普通矽膠好多, 而且長時間帶都唔會唔舒服.

依d全部都係有提供訂製耳機既公司, 其中左上既LEAR更係香港品牌黎

離開普通耳機一下, 唔知大家有冇留意過舞台上歌手或明星所用既耳機呢? 同我地平時可以係街上買到既有分別. 大部份歌星既都係特製既, 係佢耳上既個一對耳機只係佢自己帶到, 想比你試聽都唔得, 因為係度耳做, 個人化耳機, 英名叫Custom In-ear Monitors, 簡稱CIEM.

CIEM平既千幾蚊都有交易, 貴既可以上萬, 自由度非常之大, 不同既單元數目, 外觀上既面板, 顏色, 材料, 去到線材, 插頭等等, 只要你比錢既話, 你點做都得. 

同所有電子產品, Gadget等等一樣, 耳機, 耳筒都有各有不同, 有d用跟機送既, 能夠享受到音樂本身就足夠, 其他既想得到更多既, 亦都有唔同方法去追求極致, 最緊要係知自己想要既係咩, 同買返黎既又係咩.

手錶 - 膠帶? 鋼帶? 皮帶?

手錶, 一樣聽落好似好必須, 同日常生活惜惜相關既貼身物品, 但係老實講句, 依加仲有邊個係因為真係需要睇下依加係幾點鐘, 先會帶住隻錶? 相信我地依加要知幾點, 都只會著一著自己部電話, 甚至本身都用緊部機, 睇睇上邊條Status Bar就Okay.

所以黎到今時今日, 手錶已經變成同手鏈差唔多角色, 只係飾物既一種, 不過就算係咁, 我都認為一隻好錶, 係好重要. 特別係身為男士, 手錶可以比到人成熟,  守時, 同可靠既感覺. 要配合好, 唔需要多, 三隻就夠: 一隻膠錶, 一隻鋼錶, 同一隻皮錶.

膠錶最簡單, 唔會錯既選擇當然係Casio C-Shock啦, 唔講太多喇, 今次既重點放返係下面兩位度.

鋼錶, 一定要有一隻, 著起Suit上黎, 唔通仲帶膠錶咩? 一講到鋼錶太家都可能覺型就係型, 但係又好貴, 未必買得起, 為左有隻鋼錶而走去買隻街邊野又唔知用得幾耐. 其實鋼錶又唔需要下下諗Rolex, Omega, Longines既, 普通4個位既價錢都已經買到好唔錯架喇.

平時幾萬, 甚至幾十萬一隻個d歐洲, 多數係瑞士錶芯, 但係其實美國, 或者日本錶芯都做得好好, 或者有一d比起歐洲既仲要出色. 歐洲錶芯唔係話唔好, 有邊個唔想要隻Patek Philippe, 或者IWC? 但係有時佢地咁貴, 好多係因為佢地個名氣, 或者係炒價黎.

好多比較年輕品牌都有出鋼錶, 例如 Marc by Marc Jacobs, Agnes B, Vivienne Westwood等等, 但好多時大眾都認為佢地只係sell自己個brand, 收高價, 但係是但比d野你. 不過你諗深一層, 佢地話晒都叫名牌, 唔會咁攪自己個名既, 深入去了解一下你就會發現你唔需要擔心佢造工, 因為佢地好多都會搵一d知名錶廠代工, 例如Marc by Marc Jacobs搵美國既Fossil, Agnes B就搵日本既Seiko.

皮錶, 可以話係鋼錶既另類選擇, 唔夠Budget入三隻既, 就一隻膠錶, 加鋼, 皮二選一吧. 我自己就有兩隻唔同色既皮錶, 一隻係最傳統黑皮革, 另一隻就係vintage味濃一d既啡皮. 我之前會覺得皮革錶好老, 完全唔適合我地後生仔帶, 但我發現我真係太錯喇. 一講皮革錶你就可能聯想到爺爺嬤嬤手上個隻, 但其實佢非常之百搭. T-Shirt短褲加隻就即刻Smart Casual, 著住Suit咩, 皮革錶又唔比鋼錶失禮. 相信我啦, 去試試, 試過你就明.

太陽鏡

黎到炎炎夏日, 除左皮膚要防曬, 我地眼睛都需要防曬既, 所以今回就同你地討論下太陽鏡. 如果你地有睇開我依個blog都會發現我目標永遠都係以最少, 或者最簡單既野, 黎創造唔同既造型, 今次亦唔例外.

一對百搭既Wayfarer, 一副型格既Aviator, 再加多一副玩味重d, 特別d既就夠”曬”.

Wayfarer基本上已經係萬能, 你睇佢咁多年都一直有人帶, 加上明星至愛就略知一二. 唔理你Smart定Casual, 加上對Wayfarer已經唔會錯. 所以點樣配合已經唔需要多講.

Aviator其實只係因為有Wayfarer既出現所以先會感覺上冇咁重要, 而比起Wayfarer, 一副Aviator比人既感覺就更有味度. 我個人之前都只係帶Wayfarer既, 但係特別係著得Casual一d, 或者係戶外活動既時候, Aviator應該係既好既選擇. 嚴格黎講, Aviator既遮光作用應該相比其他太陽鏡好, 因為佢本身係身機師要設, 所以名都會同Aviation等等航空用語有關.

係天空中冇左雲層既遮擋, 而太陽強光直接咁照, 一來影響飛行安全, 二來對飛機師既眼睛都唔好. 因為咁, 所以一對Aviator既鏡片會比較大, 而且跟住面型彎曲, 盡量比到雙眼全方位既保護. 最後漸漸就普遍左, 可能都係因為機師已經比人好型既印象掛!

如果已經有對Wayfarer或者Aviator, 有budget或者想入多對鏡既, 就可以大憺少許, 買副誇張d既. 其實每一件衫, 褲, 鞋, 襪, 飾物, 我地都應該有一件Statement Piece, 一定係誇張, 吸引目光既, 咁先會有驚喜同新鮮感. 而我推介過既Gentle Monster就係好好既選擇. 以下就有幾個我自己既Style Pick, 比少許靈感你地. 順帶一提, 之前應承過你地會引入Gentle Monster鏡既@installhk已經上架喇, 大家可以去睇下啱唔啱喇!